嘆茶 2017-08-12

十多位樂也書友入深井到鄭記士多嘆茶兼聽茶經,鄭生中氣十足咁一邊唸讀古代茶經一邊介紹做法,生鬼之餘又有知識嘅傳受。奶茶、咖啡、鐵觀音latte、唐朝煎茶製法活現眼前。

咖啡隨著溫度下降,咖啡味就會跑出黎,如果咖啡唔靚或者功夫唔夠,酸味會滲出黎,而呢度O既咖啡酸度一直維持好低。

鐵觀音latte奶滑茶香,茶嘅回甘足以讓人嘗到甘甜,齒頰留香。

奶茶同煎茶亦各有精彩之處,要沖到咁好飲,必須有精煉O既功夫同對材料有細緻O既了解。

製茶強調火O既控制,鄭生只用手去感受煮具O既溫度,呢D就係扎實O既基本功,如廚師擁有精巧O既刀功一樣。另外,從斯理蘭卡運送O既紅茶,由於經過一後時間O既船運,因此擺放係船側、船艙、船尾都會受唔同程度環境O既影響,因此茶味會唔一樣,一個茶師必須留意得夠仔細。係咪諗起都攰呢?出色O既料理人必須經歷呢種攰。

另外,鄭生仲好慷慨咁拎O左私伙雪糕畀我地品嚐,有梅菜鯇魚雪糕加辣醬、特濃朱古力雪糕加蟹醬/士多啤梨醬、茅台浸提子。係鄭生對雪糕定義O既其中一個條件係要齒頰留香,做唔到就唔係雪糕。我地當日食到o既的的確確係雪糕。

鄭生仲係個有想法O既料理人,對茶、雪糕都有自己一套嚴格O既定義,而佢亦提醒我地後輩唔好做匠人,要有自己諗法,拒絕默守成規。係我眼中,佢的確唔係匠人,而係近乎料理思想家。

最後,一定要講o既係,佢都係一個書蟲,多次強調要睇陸羽o既茶經。佢曾經用五年時間晚晚睇書睇到四、五點,因此,茶點解好飲?背後係大條道理o既。

<KiKi Lam>

Facebook Comments

Back to Top